و أخيراً..... التمرد

مساء الخير

في الشارع يقولولي انته متين 

طيب اعرف ما جبتوا شي جديد

ارجع البيت يقابلوني أهلي بسؤالهم المعتاد متى بتضعف؟؟!!

اروح غرفتي امسك جسمي و اشده اشوف كمية الشحم اتقزز تنزل دمعه ترثي الحال

امسحها و كأنها لم تنزل و انام على سريري 

اصحى و اتصل بصديقي 

يا فلان ابي اشوفك... و يتم الاتفاق

نطلع بالسياره نتمشى 

اقوله يا فلان نفسي احب و انحب 

يقولي لازم تضعف و ساعتها بيجونك مثل النمل لأنه عيبك الوحيد متنك

ابتسم و أرجع بالذاكره للوراء أدور سبب للحاله اللي انا وصلتها

و فجأه عرفت...

لما كنت أصغر و أنحف

تحرش فيني راعي الدكان الحقير 

و لما ركبت تاكسي مد يده و اشبع شهواته الدنيئه

لما كبرت شوي و متنت حبتين 

لاحظت انه راعي الدكان ما قام يمد يده كثير

بس بين فتره و فتره كل ما ركبت تاكسي يجي يمد يده و انا ساكت

لا جظت اني كل ما أسمن اشوف هذولا المرضى ينقصون

كل اللي كانوا يتغذون من برائتي بدأوا يسقطون واحد تلو الآخر

لا شعورياً لقيت الحل في السمنه

و ضليت آكل الى ان وصلت الى ما انا عليه الحين

لما اتذكر كل اللي صار 

ابتسم لصاحبي في السياره و اقوله ان شاء الله

اذكر الدمعه اللي نزلت بالغرفه و اغمزلها

و انا في داخلي اعرف انه مثلها بينزل المئات 

و لكن ان تنزل هذي الدمعات اهون عندي الف مره من كائنات حقيره  تآكل فيني و بثقتي بنفسي

نعم انا متين و حالتي الصحيه في خطر و لكن..

من يضمنلي انه لما انحف كل هالمرضى اللي حوالينا بيروحون

كل اللي نهشوا في لحمي بيختفون

للأسف أفضل اني اموت الف مره و لا ارجع للي كنت فيه

و لكـــــــــــــن

بما أني داخل على سنة جديده 

سنه قررت انه شعارها الحرية و التمرد

قررت اني اكسر الحاجز و أعمل عملية تحويل معده

نعم

هؤلاء أحقر من أن أضيع صحتي لأجلهم 

 قررت اني اهتم بنفسي و اتمرد على ضعفي و اقف بوجه كل اللي يفكر انه يمد يده علي مره ثانيه

قررت اعيش حياتي بحريه و بدون الثقل اللي شايله معي

اتمنالكم سنه كلها حريه و تمرد على كل ما قيدكم و حد من حريتكم

تحياتي لكم...