السلام عليكم و رحمة الله و بركاته و طيب صلواته
أسعد الله مساكم و أيامكم
بدايةً رجاء خاص لتركواز
" مهما صارلك في هالدنيا لا تقطع الكتابه و لا تقطع عنا كتاباتك، أعرف اني مقصر و ما ارد على بوستاتك بس و الله متابع
و بليز ارجع اكتب و دون يومياتك و أتمنالك الخير و التوفيق في حياتك"
هالفتره صايره امور كثيره بحياتي و حاس اني فقدت التوازن اللي كنت عايشنه قبل فتره
اول شي رجعت لصاحبي اللي كنت اتكلمت عنه في البوست الماضي و رجعت علاقتنا أقوى عن قبل و الله يديم الموده
هالفتره تاعبني التفكير وايد في موضوع المثليه
يعني أنا مقتنع انها شي في طبيعتي و ما هو بشذوذ و هذا شي اعرفه نتيجة لتفكيري و لدراستي
و كنت معتقد اني طبيعي و اني عايش في تناغم مع المجتمع لين فتره قريبه
لما قلت لأقرب صديق عندي اني مثلي و هو تقبل الموضوع الحمد الله و بعد ما ذقت معنى اني اعيش على طبيعتي جد و انا معاه
صرت اتعب لما اطلع مع الناس الثانيه او مع اهلي او المجتمع ككل
صرت احس بالعجز لما احد يشتم المثليين و انا اسكت و ما ادافع و امسك نفسي عشان ما يشك فيني
صحيح انه ممكن اني اقول انه هالناس ما تهمني و اكبر شي بيصير لو عرفوا انهم بيتركوني
بس ما اتحمل انه كل اللي اعرفهم يتركوني و حتى اهلي يتخلون عني
بعد ما كنت احس بالتناغم مع المجتمع بديت اشوف شقد مجتمعنا منغلق على نفسه و ما يتقبل الافكار الأخرى
في يوم كنت قاعد مع احد الشباب و كنا نتناقش في موضوع العبوديه و لما قلتلي اني اؤمن بالحريه و الليبراليه اتهمني بالالحاد
و ما تقبل رايي أبداً انصدمت منه و لكني سكت و ما كبرت الموضوع و شبه أقنعته بكلامي
تعبت من هالمجتمع اللي كل افكاره سطحيه
و تعبت من هالمجتمع اللي شبابه ما يفكر غير بالسكس و المال و كأنه العقل لم يخلق الا لجمع المال
بديت افكر بجديه في الهجره و الانتقال لدوله ثانية و اعيش على طبيعتي مع ناس ممكن تتقبلني
شي ثاني تعبت و انا فكر فيه و هو اني لما قررت اني أكون علاقه صرت احس بالذنب بعد ما أسوي شي له علاقه بالمثليه
أقل شي كمكالمه هاتفيه موضوعها رومانسي احس بالذنب و الاحتقار و التقزز من نفسي ما اعرف ليش يمكن لأني تربيت على انه
المثليه و الحميميه شي غلط و لكن انا كإنسان بالغ ما اشوف انهم غلط
بس ما اعرف تفكيري تعبني و بديت احس اني متلخبط و مو قادر اركز على حياتي
هذه كل خربشاتي لليوم
PEACE
ليست هناك تعليقات:
إرسال تعليق